شاه داغیم، از شهریار گزیدهٔ اشعار ترکی 163

شاه داغیم، چال پاپاغیم، ائل دایاغیم، شانلی سهند´یم ,

باشی طوفانلی سهند´یم ,

باشدا حئیدر بابا تک قارلا، قیروولا قاریشیب سان ,

سون ایپک تئللی بولودلارلا اوفوقده ساریشیب سان ,

ساواشارکن باریشیب سان ,

گؤیدن ایلهام آلالی سیرری سماواتا دئیه رسه ن ,

هله آغ کورکو بورون، یازدا یاشیل دون دا گئیه رسه ن ,

قورادان حالوا یئیه رسه ن ,

دؤشلرینده سونالار سینه سی تک شوخ ممه لرده ,

نه شیرین چئشمه لرین وار ,

او یاشیل تئللری، یئل هؤرمه ده آینالی سحه رده ,

عشوه لی ائشمه لرین وار ,

قوی یاغیش یاغسا دا یاغسین ,

سئل اولوب آخسا دا آخسین ,

یان لاریندا دره لر وار ,

قوی قلمقاش لارین اوچسون فره لرله، هامی باخسین ,

دوش لرینده هئره لر وار ,

سیلدیریم لار، سره لر وار ,

او اتک لرده نه قیزلار یاناغی لاله لرین وار ,

قوزولار اوتلایاراق نی ده نه خوش ناله لرین وار ,

آی کیمی هاله لرین وار ,

گول چیچکدن بزه ننده، نه گلین لر کیمی نازین ,

یئل اسنده او سولاردا نه درین راز و نیازین ,

اوینایار گوللو قوتازین ,

تیتره ییر ساز تئلی تک شاخه لرین چایدا - چمنده ,

یئل او تئل لرده گزه نده، نه کوراوغلو چالی سازین ,

اؤرده گین خلوت ائدیب گؤلده پری لرله چیمنده ,

قول-قاناددان اونا آغ حوله آچار غمزه لی قازین ,

قیش گئدر، قوی گله یازین ,

هله نوروز گولی وار، قار چیچگین وار، گله جکلر ,

سئل - یاغشیدا یویونارکن ده گونش له گوله جکلر ,

اوزلرین تئز سیله جکلر ,

قیشدا کهلیک هوسیله، چؤله قاچدیقدا جوان لار ,

قاردا قاققیلدایاراق نازلی قلمقاش لارین اولسون ,

یاز، او دؤش لرده ناهار منده سین آچدیقدا چوبان لار ,

بوللو ، سودلو سورولر، دادلی قاووتماش لارین اولسون ,

آد آلیب سندن او شاعیر کی سن اوندان آد آلارسان ,

اونا هر داد وئره سه ن، یوز او مقابل داد آلارسان ,

تاریدان هر زاد آلارسان ,

آداش اولدوقدا، سن اونلا داها آرتیق اوجالارسان ,

باش اوجالدیقدا دماوند داغیندان باج آلارسان ,

شئر الیندن تاج آلارسان ! ,

او دا ، شعرین، ادبین شاه داغی دیر، شانلی سهندی ,

او دا ، سن تک آتار اولدوزلارا شعریله کمندی ,

او دا سیمرغ دن آلماقدادی فندی ,

شعر یازاندا قلمیندن باخاسان دورر سپه لندی ,

سانکی اولدوزلار الندی ,

سؤز دئینده گؤره سن قاتدی گولو، پوسته نی، قندی ,

یاشاسین شاعر افندی ,

او نه شاعر، کی داغین وصفینه مصداق اونو گؤردوم ,

من سنین تک اوجالیق مشقینه مشاق اونو گؤردوم ,

عشقه، عشق اهلینه مشتاق اونو گؤردوم ,

او نه شاعر، کی خیال مرکبینه شووشیغایاندا ,

او نهنگ آت، آیاغین توزلو بولودلاردا قویاندا ,

لوله لنمکده دی یئر-گؤی، نئجه طومار ساریاندا ,

گؤره جکسن او زاماندا ,

نه زامان وارسا، مکان وارسا کسیب بیچدی بیر آندا ,

گئچه جک لر، گله جک لر نه بویاندا، نه او یاندا ,

نه بیلیم قالدی هایاندا؟ ,

باخ نه حرمت وار اونون اؤز دئمیشی توک پاپاغیندا ,

شهریارین تاجی اگمیش باشی دورموش قاباغیندا ,

باشینا ساوریلان اینجی، چاریق اولموش آیاغیندا ,

وحی دیر شعری، ملک لردی پیچیلدیر قولاغیندا ,

آیه لردیر دوداغیندا ,

او دا داغلار کیمی شآنینده نه یازسام یاراشاندیر ,

او دا ظالم قوپاران قارلا، کولک له دوروشاندیر ,

قودوزا، ظالیمه قارشی سینه گرمیش، ووروشاندیر ,

قودوزون کورکونه، ظالم بیره لر تک داراشاندیر ,

آمما وجهینده فقیر خلقی اگیلمیش سوروشاندیر ,

قارا میللتده هنر بولسا، هنرله آراشاندیر ,

قارالارلا قاریشاندیر ، ,

ساریشاندیر ! ,

گئجه حقین گؤزو دیر، طور تؤره تمیش اوجاغیندا ,

اری ییب یاغ تک اوره ک لردی یانیرلار چیراغیندا ,

مئی، محببتدن ایچیب لاله بیتیبدیر یاناغیندا ,

او بیر اوغلان کی، پریلر سو ایچه رلر چاناغیندا ,

اینجی قاینار بولاغیندا ، ,

طبعی بیر سئوگلی بولبول کی، اوخور گول بوداغیندا ,

ساری سونبول قوجاغیندا ,

سولار افسانه دی سؤیله ر اونون افسونلی باغیندا ,

سحرین چنلی چاغیندا ,

شاعرین ذٶقو، نه افسونلی، نه افسانه لی باغ لار ,

آی نه باغ لار، کی «الف لیله» ده افسانه ده باغ لار ,

اود یاخیب، داغلاری داغ لار ,

گول گولرسه بولاغ آغ لار ,

شاعرین عالمی اؤلمز، اونا عالمده زوال یوخ ,

آرزیلار اوردا نه، نه خاطرلیه امکان دی، محال یوخ ,

باغ جنت کیمی اوردا «او حرام دیر، بو حلال»یوخ ,

او محببتده ملال یوخ، ,

اوردا حال دیر، داها قال یوخ ,

گئجه لر اوردا گوموش دندی، قیزیلدان نه گونوزلر ,

نه زمرد کیمی باغ لاردی، نه مرمر کیمی دوزلر ,

نه ساری تئللی اینک لر، نه آلا گؤزلو اؤکوزلر ,

آی نئجه ، آی کیمی اوزلر ,

گول آغاجلاری ، نه طاوس کیمی چترین آچیب الوان ,

«حله »کروانی دی، چؤل لر، بزه نر سورسه بو کروان ,

دوه کروانی دی ، داغ لار، یوکی اطلس دی بو حیوان ,

صابرین شهرینه دوغرو، قاطاری چکمه ده سروان ,

او خیالیمداکی «شیروان» ,

اوردا قار دا یاغار، آمما داها گول لر سولا بیلمز ,

بو طبیعت، او طراوتده محالدیر، اولا بیلمز ,

عمر پئیمانه سی اوردا دولا بیلمز ,

او افق لرده باخارسان نه ده نیزلر، نه بوغازلار ,

نه پری لر کیمی قولار، قونوب-اوچماقدا نه قازلار ,

گؤلده چیممکده نه قیزلار ,

بالیق، اولدوز کیمی گؤل لرده، ده نیزلرده پاریلدار ,

آبشار مرواری سین سئل کیمی تؤکدوکده خاریلدار ,

یئل کوشولدار، سو شاریلدار ,

قصرلر واردی قیزیلدان، قالالار واردی عقیق دن ,

«رافائل» تابلوسی تک، صحنه لری عهد عتیق دن ,

دویماسان کؤهنه رفیق دن ,

جننتین باغ لاری تک باغلاری نین حورو قصوری ,

دوزولوب غرفه ده ، ایواندا ، جواهر کیمی حوری، ,

الده حوری لری نین جام بولوری ,

تونگونون گول کیمی «صهبای طهوری» ,

نه ماراق لار کی، آییق گؤزلره رؤیادی دئییرسن ,

نه شافاق لار کی، ده رین باخمادا دریادی دئییرسن ,

اویدوران جنت مأوادی دئییرسن ,

زهره نین قصری بریلیان، حصاری نرده سی ، یاقوت ,

قصر جادودی، مهندس لری هاروت ایله ، ماروت ,

اوردا «مانی» دایانیب قالمیش او صورت لره مبهوت ,

قاپی قوللوقچوسو هاروت ! ,

اوردا شعرین، موزیکین منبعی سرچئشمه دی قاینار ,

نه پری لر کیمی فواره دن افشان اولوب اوینار ,

شاعر آنجاق اونو آنلار! ,

دولو مهتاب کیمی استخردی فواره لر ایله ,

ملکه اوردا چیمیر، آی کیمی مهپاره لر ایله ,

گوللو گوشواره لر ایله ,

شعر و موسیقی شاباش اولمادا، افشان دی پریشان ,

سانکی آغ شاهی دیر اولماقدا گلین باشینا افشان ,

نه گلین لر کی، نه انلیک اوزه سورترله، نه کیرشان ,

یاخا نه تولکی نه دووشان ! ,

آغ پری لر، ساری کؤینکلی بولودلاردان انیرلر ,

سود گؤلونده ملکه ایله چیمیرکن سئوینیرلر ,

سئوینیرلر، اؤیونورلر ,

قووزاناندا هره الده دولو بیر جام آپاریرلار ,

سانکی چنگی لره، شاعرلره الهام آپاریرلار ,

دریا قیزلارینا پیغام آپاریرلار ,

ده نیزین اؤرتوگو ماوی، افقون سقفی سماوی ,

آینا دیر هر نه باخیرسان : یئر اولوب گؤی له مساوی ,

غرق اونون شعرینه راوی ,

غرفه لر، آی، بولود آلتیندا اولار تک گؤرونورلر ,

گؤز آچیب-یومما، چیراغ لار کیمی یاندیقدا سؤنورلر ,

صحنه لر چرخ فلک تک بورولوب، گاه دا چؤنورلر ,

کؤلگه لیک لر سورونورلر ,

زهره ایواندا الهه شینلینده گؤرونرکن ,

باخاسان حافظی ده اوردا جلالت له گؤررسن ,

نه سئور سن ,

گاه گؤرن حافظ شیراز ایله ایواندا دوروبلار ,

گاه گؤرن اورتادا شطرنج قورارکن اوتوروبلار ,

گاه گؤرن سازیله، آوازیله اگلنجه قوروبلار ,

سانکی ساغر ده ووروبلار ,

خاجه الحان اوخویاندا، هامی ایشدن دایانیرلار ,

او نوالرله پری لر گاه اویوب گاه اویانیرلار ,

لاله لر شعله سی، الوان شیشه رنگی بویانیرلار ,

نه خومار گؤزلو یانیرلار ,

قاناد ایستیر بو افق، قوی قالا طرلانلی سهند´یم ,

ائشید اؤز قصه می، دستانیمی، دستانلی سهند´یم ,

سنی «حیدر بابا» اول نعره لر ایله چاغیراندا ,

او سفیل داردا قالان تولکو قووان شئر باغیراندا ,

شیطانین شیللاغا قالخان قاطیری نوخدا قیراندا ,

«دده قورقود» سسین آلدیم، دئدیم «آرخامدی» ایناندیم ,

آرخا دوردوقدا «سهندیم» ساوالان تک هاوالاندیم ,

سئله قارشی قووالاندیم ,

«جوشغون»ون دا قانی داشدی، منه بیر هایلی سس اولدو ,

هر سسیز بیر نفس اولدو ,

«باکی »داغلاری دا، های وئردی سسه، قیها اوجالدی ,

او تایین نعره لری سانکی بو تایدان دا باج آلدی ,

قورد آجالدیقدا قوجالدی ,

«راحیم »ین نعره سی قووزاندی، دئیه ن توپلار آتیلدی ,

سئل گلیب نهره قاتیلدی ,

«رستم »ین توپلاری سسلندی، دئیه ن بوملار آچیلدی ,

بیزه گول-غنچه ساچیلدی ,

«قورخما گلدیم !»دئیه، سسلرده منه جان دئدی قارداش ,

منه جان-جان دئیه ر ک، دشمنه قان-قان دئدی قارداش ,

شهریار سؤیله مه دن گاه منه سلطان دئدی قارداش ,

من ده جانیم چغیریب: جان سنه قوربان دئدی قارداش ,

یاشا اوغلان سیزه داغدان دلی جئیران دئدی قارداش ,

ائل، سیزه قافلان دئدی قارداش ,

داغ، سیزه آصلان دئدی قارداش ,

داغلی حیدربابا´نین آرخاسی هر یئرده داغ اولدو ,

داغا داغلار دایاغ اولدو ,

آرازیم آینا-چیراغ قویمادا،آیدین شافاق اولدو ,

او تایین نغمه سی قووزاندی، اوره ک لر قولاق اولدو ,

یئنه قارداش دئیه ر ک قاچمادا باشلار آیاق اولدو ,

قاچدیق، اوزلشدیک آرازدا، یئنه گؤزلر بولاغ اولدو ,

یئنه غم لر قالاغ اولدو ,

یئنه قارداش سایاغی سؤزلریمیز بیر سایاغ اولدو ,

وصل ایگین آلمادا، ال چاتمادی عشقیم داماغ اولدو ,

هله لیک غم سارالار کن قارالار دؤندی آغ اولدو ,

آرازین سود گؤلو داشدی، قایالیق لار دا باغ اولدو ,

ساری سونبول لره زلف ایچره اوراقلار داراغ اولدو ,

یونجالیق لار یئنه بیلدیرچینه یای-یاز یاتاغ اولدو ,

گؤزده یاشلار چیراغ اولدو ,

لاله بیتدی یاناغ اولدو ,

غنچه گولدی، دوداغ اولدو ,

نه سول اولدو، نه ساغ اولدو ,

ائلیمی آرخامی گؤردوکده ظالیم اووچو قیسیلدی ,

سئل کیمی ظلمو باسیلدی، زینه آرخ اولدو، کسیلدی ,

گول گؤزوندن یاشی سیلدی ,

تور قوران اووچی آتین قوومادا سیندی، گئری قالدی ,

اؤزو گئتدی، تورو قالدی ,

آمما حئیدربابا دا بیلدی کی، بیز تک هامی داغلار ,

باغلانیب قول-قولا زنجیرده، بولودلار اودور آغلار ,

نه بیلیم ، بلکه طبیعت اؤزو نامرده گون آغلار ,

اگری یول لاری آچار کن، دوز اولان قول لاری باغلار ,

صاف اولان سینه نی داغلار ! ,

داغلارین هر نه قوچو، طرلانی، جئیرانی، مارالی ,

هامی دوشگون، هامی پوزغون، سینه لر داغلی، یارالی ,

گول آچان یئرده سارالی ,

آمما ظن ائتمه کی، داغ لار یئنه قالخان اولاجاقدیر ,

محشر اولماقدادی بونلار داها وولقان اولاجاقدیر ,

ظلم دنیاسی یانارکن ده تیلیت قان اولاجاقدیر ,

وای ...! نه توفان اولاجاقدیر! ,

دردیمیز سانما کی، بیر تبریز-و تهران´دیر عزیزیم ,

یا کی، بیز تورکه جهنم اولان ایران´دیر عزیزیم ,

یوخ بو دین داعواسی دیر، دنیا تیلیت قاندیر عزیزیم ,

تورک اولا، فارس اولا دوزلوک داها تالان دیر عزیزیم ,

بیز آتان دین دیر، آتان دا بیزی ایمان دیر عزیزیم ,

سامری مرتد ائدیب هر نه مسلمان دیر عزیزیم ,

امتین هارونو من تک، له له گریان دیر عزیزم ,

هر طرفدن قیلیج ائندیرسه لر قالخان دیر عزیزیم ,

بیر بیزیم درمانیمیز موسی-یی عیمران´دیر عزیزیم ,

گله جک شبهه سی یوخ، آیه-ی قرآن دیر عزیزیم ,

او هامی دردلره درمان دیر عزیزیم ,

دکتر اولدوقدا بشر بو یارانی ساغلاماق اولماز ,

اولماسا آللاه الی دین مرضین چاغلاماق اولماز ,

داغلاماقدا علاج اولسا بیر ائلی داغلاماق اولماز ,

دینی آتمیش ائله یاوروم داها بئل باغلاماق اولماز ,

او گولوب آغلایا دا، اونلا گولوب آغلاماق اولماز ,

شیطانی یاغلاماق اولماز ,

دئدین: آذر ائلی نین بیر یارالی نیسگیلی یم من ,

نیسگیل اولسام دا گولوم ! بیر ابدی سئوگیلی یم من ,

ائل منی آتسا دا اؤز گولشنیمین بلبلی یم من ,

ائلیمین فارسیجا دا دردینی سؤیله ر دیلی یم من ,

حقه دوغرو نه قارانلیق ایسه ، ائل مشعلی یم من ,

ابدیت گولوی یم من ! ,

نیسگیل اول چرچییه قالسین کی جواهر نه دی قانمیر ,

مدنییت ده بین ائیلیر بدوییت، بیر اوسانمیر ,

گون گئدیر آز قالا باتسین گئجه سیندن بیر اویانمیر ,

بیر اؤز احوالینا یانمیر ,

آتار اینسان لیغی ، آمما یالان انسابی آتانماز ,

فتنه قووزانماسا بیر گون گئجه آسوده یاتانماز ,

باشی باشلارا قاتانماز ! ,

آمما مندن ساری، سن آرخایین اول شانلی سهند´یم ,

دلی جئیرانلی سهند´یم ,

من داها عرش علا کؤلگه سی تک باشدا تاجیم وار ,

الده موسی کیمی فرعونه غنیم ، بیر آغاجیم وار ,

حرجیم یوخ، فرجیم وار ,

من علی اوغلویام، آزاده لرین مردی ، مرادی ,

او ، قارانلیق لارا مشعل ,

او ، ایشیقلیق لارا هادی ,

حقه، ایمانه منادی ,

باشدا سینماز سپریم، الده کوتلمز قیلیجیم وار! ,